NJOBVU YOLUSA YAPHA MLIMI WINA KU MANGOCHI.

Mlimi wina waphedwa ndi njobvu yolusa kufupi ndi nkhalango ya Namizimu m’boma la Mangochi.

Ofalitsa nkhani zapolisi m’bomali Inspector Amina Tepani Daudi, watsikimizira URS kuti mlimiyo ndi a Shaibu Bunanji azaka 50 ndipo lamulungu pa 29 March anakumana ndi njobvuyo pomwe amakathamangitsa anyani omwe amamuonongera mbeu zawo.

Malingana ndi Daudi, ati anthu ozungulira omwe amaona izi zikuchitika anayetsetsa kuthamangitsa chilombocho koma zinakanika mpaka chinakwanitsa kuvulaza a Bunanji mpaka kufa.

Pakadali pano, apolisi atengera nkhaniyi ku nthambi yowona za nyama zakutchire kuti achitepo kanthu.

A Bunanji amachokera m’mudzi mwa Chapola, m’dera la mfumu yayikulu Chowe ku Mangochi.